2Jo | WSK | STEP |

2 JOHN

Kari tam gawa tukunang imi batogam mu Jesus ko olekem John agila, bare nu ko nup wetang te me balam. Kari saki ikisan, John nu “Kris imet aora se ko kuriang ago” nunga balso mu nu congregation bo ko balso masan. Se “uria ko kuriang alo” mu congregation bo tala nunga balso. John Kris alo nunga maonam, “Den nunguning ilukuawu se ninimi ko kua se bagaralko,” mam. Jesus Kristus mu nu kari nunguning, se Kaem ko Namar mam, se kawel kari den kigilik balmon, mu nuna nunga den me ikimonko mam.

2 John

Den gira

1 Ani Kris kari supuling, ani den imi bataguru ni Kris imet aora se ka kuriang ago ningarsam ^{▼▼2 John 1:1,4,13 John Kris kariimet nunga balso agila. Den gira mu arikko.}. Ani ninguru ninga kuesam. Se ani la mena, kariimet suen la den nunguning ikisan ale karo tusan mu betela tala nina ninguru ninga kuesan. 2 Mu awuk, den nunguning mu nina ta, ana ta, suen la nangate aniso, ale tom suen biya nangate anirukko.

3 Se ana den nunguning mu karo tui se, nainimi ko kua se baganak, se nanga Ba Kaem, ko Namar Jesus Kristus ilak, nunga nongomang bataga, nunga saonga yawara, se nunga nongomang lila nangarmon se te baganakko.

Nainimi ko kuera ko munan

4 O imet aora, ani nika kuriang saki den nunguning karo tui se anisan wore ko den ikiem ale ninguru amilmilerem, Kaem den karo tunakko balam butata nuna karo tusan. 5 Se ani iwita ka manorsam: ana nainimi ko ninguru kuenakko. Mu munan bo iru ani me balu kisisam. Mena. Duap te nunguningkiri ana munan imi taman. 6 Se nainimi ko kuera ko munan nunguning mu iwita: ana Kaem ko munan den karo tunakko. Se Kaem ko munan den nina duap te ikiman mu iwita: nina ninimi ko kuera ko munan ninguru karo tualko.

Den kawel ko sinar tamonko den

7 Kawel kariimet suen biya anananga kulurmonko ali imi te geragasan. Nuna iwita balsan, “Jesus Kristus mu nu kari nunguning ko me aratam,” masan. Bare awiriya uwuta balso mu nu kawel kari. Nu Kristus ilak kagerso. 8 Se ninguru sinar talko! Nina koma yawara gialko ko ura bita lagaman bare me gial bore ko! Buta se sokel ago bagaral mu asele koma ningo talko. 9 Awiriya Kristus ko den nunguning diram me ilukuawuso, nu taso ale guruguso kigilik balso, mu Kaem kari umutang ilak me bagoso. Bare awiriya Kristus ko den ninguru ilukuawuso, mu Kaem ko Namar ilak nu ilak bagasan. 10 Buta se, awiriya nengete nama aratuk ale den imi me ninga manuk, nu den kigilik baluk, mu kari umutang me amilmil tual ale, woremkalal yawara ma me balal ale, ilak ninga kawam te me namaralko. ^{▼▼2 John 1:10-11 Rom 16:17; 1 Tim 5:22 ago arikko.} 11 Bare awiriya kari umutang amilmil tuso, mu nu kawel kari umutang ko ura memek mu sokel tuso.

Den nukum

12 Ani den suen biya ningarikko, bare tam gawa te bataguru ningarikko me ko kuesam. Aninga angamang mu ani tairik ningarkik ale biguwunak munakanak ale ninguru amilmilanakko aniso.

13 Se imet aora, nika uria ko kuriang alo ani agarak bagasan bare nunga amilmil den beteman se nikate namoso.